JA Əməkdaşlıq 2019 Mükafatının qalibləri – JA Azərbaycan və JA Estoniya

Noyabrın 21-də Almaniyanın paytaxtı Berlin şəhərində keçirilən Qlobal Liderlik Konfransında JA 2019 mükafatlarının qalibləri elan edildi. JA şəbəkəsinin iki üzvü JA Azərbaycan və JA Estoniya, Avropa İttifaqı tərəfindən maliyyələşdirilən “Gənclərin Sahibkarlıq Fəaliyyətinə Dəstək” layihəsi çərçivəsində uğurlu tərəfdaşlığa görə JA 2019 Əməkdaşlıq Mükafatına layiq görüldü. Layihə, Azərbaycana maliyyə savadlılığı və sahibkarlığın əsaslarının orta və peşə məktəblərində tədrisi üzrə Avropa təcrübəsini gətirdi.

Əməkdaşlıq mükafatını əldə etmək üçün irəli sürülən layihə, JA Worldwide-ın missiyasını, habelə yeni resursların yaradılması, uğurlu əməkdaşlıq və ya proqramın böyüməsi sahələrində müsbət və nəzərəçarpacaq dərəcədə yüksək nəticələr nümayiş etdirməlidir. JA 2019 Əməkdaşlıq Mükafatı üzrə namizədlər JA Azərbaycan və JA Estoniya: Aİ layihəsi, JA Avropa: USAİD layihəsi, INJAZ Bəhreyn, JA Venesuela və JA Kolumbiya idi.